O suplemento dominical do diario portugués Público, do pasado día 3 de maio, dedica un artigo aos militares da UMD (Unión Militar Democrática), que pasaron por Lisboa como invitados ás conmemoracións do 25 de abril de 1974. O artigo, titulado “Os militares que desafiaram Franco“, está asinado por Luís Francisco e leva fotografía de Hélder Olino; vai nas páxinas 24 a 26 da revista Pública, que así se chama o dominical. É un fermoso traballo, magnificamente escrito, onde o xornalista consegue transmitir o fino humor dos protagonistas sen diluir o significado profundo, sen dúbida histórico, da súa acción e do seu sacrificio. Xosé Fortes Bouzán, amigo e asesor da nosa Fundación, Luis Otero Fernández, Fernando Reilein e José Ignacio Rodríguez representaron a aquel colectivo militar que vía con claridade o futuro da España constitucional e democrática xa nos primeiros anos da década dos 70.
O texto ten partes entrañables, coma o testemuño do capitao de Abril Carlos Almada Contreiras, que pecha o artigo: “Em Portugal, percebíamos que tínhamos a força dos números do nosso lado, havia uma enorme facilidade de contactos. Em Espanha, o que estes homes fizeram era muito mais perigoso. Eles demostraram uma coragem e uma determinaçao infinitamente superior à nossa.”
Un material de primeira, definitivamente. Grazas ao Público por lembrárnolo.
