Onte luns 25 de maio tivo lugar na Fundación Carlos Casares a presentación do último número da revista Grial, da editorial Galaxia, titulado “Olladas sobre Ramón Piñeiro”. Neste número 181 da revista réndese homenaxe ao intelecetual de Láncara ao cal este ano se dedica o Día das Letras Galegas.
No acto de presentación da revista estiveron presentes Carlos Fernández, coordinador do número xunto con Henrique Monteagudo, Miguel Barros e Damián Villalaín, colaboradores habituais de Grial e autores dalgúns dos artigos sobre Ramón Piñeiro contidos no número. Cada un deles foi debullando na súa intervención os trazos e as ideas esenciais dos seus textos sobre o intelectual. Acto seguido abriuse un animado e intenso debate sobre a figura de Ramón Piñeiro e as luces e sombras da súa traxectoria ideolóxica e vital.
