O venres día 26 celebrouse a segunda sesión de O sabor das letras, no Restaurante & Café MARCO, que tivo como invitado ao profesor Xavier Castro, historiador, catedrático da USC e ensaísta, experto en historia da alimentación. Tomando como referencia a obra senlleira de Charles Baudelaire (1861-1867), Les fleures du mal (1857), ofreceu un percorrido polos presupostos do “dandismo”, actitude vital da que o poeta francés foi un dos máximos expoñentes. Unha filosofía baseada no artificio e na inutilidade, segundo Jean Paul Sartre, quen por suposto non participaba da opinión de Oscar Wilde de que se pode prescindir de todo, agás do superfluo.
Xavier Castro, logo de enmarcar o tema con esta e outras citas, tirou da edición bilingüe de As flores do mal (Ed. Galaxia, 2008), realizada por Gonzalo Navaza, e converteu a sesión nunha homenaxe a esa parte da cultura francesa esteticamente tan prolífica, a través das referencias de Baudelaire sobre a comida e a bebida. Entre as estrofas do poeta (“vas tomar a sopa dunha vez/ traficante de nubes?”), degustáronse seis bocados exquisitos preparados polo chef Alfonso Botas, que traduciu na cociña os textos escolmados polo profesor Castro: consomé torrado de galiña; camembert sobre anaco de solombo e mostaza; tosta con lamprea á bordalesa; paté de fígados sobre crocante de pan; zamburiña á sidra de Bretaña con tagliatelle de filloa de trigo integral; e roliños de filloa con laranxa amarga e doce.
“Bebo un viño bohemio que me embriaga/ amargo e satisfeito,/ coma un líquido ceo que asolaga/ de estrelas o meu peito!”
Para acompañar, escolleuse un Albariño Rías Baixas: Martín Códax Lías de 2007, cortesía da famosa adega do Val do Salnés, ao que seguiu un borgoña tinto, Paul Pillot de 2008, para rematar a sobremesa cun Málaga torrado, MR de 2007.
É salientable que para o bocado da zamburiña á sidra de Bretaña con tagliatelle de filloa de trigo integral, contouse coa colaboración de Hervé Valette, da Creperie do Mar, que facilitou os ingredientes e a receita tradicional dos Crêpes de Blé Noir.
