Exposición que ten como obxectivo celebrar a vida e obra do escritor ourensán (1941-2002) na clave dun percorrido polo espazo e polo tempo, construíndo, en palabras do propio escritor, un mapa emocional, debuxar un territorio e contar a historia, centrándose nos detalles.
Presenta diferentes marcos nos que se desenvolve a relación de Casares co mundo, nunha sucesión de etapas simbólicas que explican cuestión fundamentais sobre a vida, a produción literaria e o seu compromiso co país. Cinco paisaxes metafóricas permeables grazas a unha coidada e novidosa montaxe modular, fundamentada na transparencia para activar experiencias sociais, políticas, educativas e artísticas.
O traxecto devolve unha imaxe que aspira ser completada polo público, nunha viaxe de ida e volta, recuperando unha nova visión do escritor e dos seus lugares, que aspira a conectar coas xeracións máis novas.
Comisariado por Gustavo Adolfo Garrido e Chus Martínez Domínguez.
Con esta exposición, a Fundación Carlos Casares profundiza aínda máis nunha faceta artística relativamente descoñecida do escritor ourensán, pero tan importante como relevante nalgunhas das súas obras literarias: a fotografía.
Esta é a primeira mostra que recolle fotografías tiradas polo propio Casares, así como outras nas que el mesmo aparece fotografado. Trátase dun conxunto de obras relacionadas con ámbitos como o familiar, onde existen retratos e autorretratos; como a fotografía de viaxes, unha actividade pola que o autor limiao sentía moito interese; ou de ámbito profesional, realizadas para unha obra de referencia como a Guía da provincia de Pontevedra, e nas que a súa temática xira en volta de aspectos culturais e tradicionais da nosa cultura.
Comisariado por Vítor Vaqueiro e Gustavo Adolfo Garrido, e baixo a coordinación técnica de Lara Bacelo, a exposición conta con máis de 50 instantáneas e outros materiais gráficos.
